港安醫院慈善基金轄下嘅BEYOND兒童特殊需要基金今日喺上環舉行啟動儀式，出席者包括委員會成員鍾麗淇(Margaret)、馬詩慧同大女王曼喜、佘詩曼、湯盈盈、周家蔚等等。Margaret透露港安醫院撥捐35萬元，作為呢個基金嘅啟動，明年4月，曾志偉會幫手舉行大型慈善籌款，Margaret話：「好多香港人唔夠錢為有病嘅小朋友治療，政府資源又有限。」

Margaret表示成立呢個基金，主要係因為3歲半嘅囡囡，佢話：「囡囡6個月大嘅時候，有次佢抽筋發燒，醫生診斷囡囡患有『4號染色體缺損綜合症』，係一個罕有嘅基因病，但唔係遺傳病，會影響佢意志力同身體遲鈍，最嚴重係過唔到兩歲，行唔到、企唔到、食唔到，經常抽筋。」雖然呢病冇得醫，但幸好囡囡情況良好，不過要定時覆診。

遇到囡囡呢個情況，Margaret終日以淚洗面？佢話：「冇時間，因為囡囡住咗醫院半年，嗰段時間我媽咪又過身，(唔怕自己鬱到有情緒病﹖)我喺政府醫院洗手間入面做瑜珈，雖然好臭，但我要RELAX，不過依家好開心，想以正能量去幫助其他小朋友。」雖然囡囡有病，但Margaret表示生多個。

另外，馬詩慧亦都話最擔心係子女生病，有次試過兩個女食錯嘢一齊嘔，搞到佢同老公王敏德幫忙清潔。有冇定期身體檢查？佢話：「會多做婦科檢查，我都有教佢哋沖涼時自我檢查。」

(2014-10-27 蘋果日報)